کراچی( )پاکستان بزنس گروپ (پی بی جی) کے سرپرست اعلیٰ فرا زالرحمان نے کہا ہے کہ خواتین کی شمولیت کے بغیرکوئی بھی معاشرہ ترقی نہیں کرسکتا۔پاکستان کی مجموعی آبادی کا نصف خواتین پر مشتمل ہے۔ اگر خواتین کی بھر پور صلاحیتوں کو استعمال کیا جائے تو معاشی بحران کا مقابلہ کیا جاسکتا ہے۔ ان خیالا ت کا اظہار انہوں نے خواتین کے عالمی دن کی مناسبت سے منعقدہ تقریب سے خطاب کرتے ہوئے کیا۔ تقریب کا اہتمام اے اینڈ آئی گروپ کے تعاون سے کیا گیا تھا جس میں مہمان خصوصی لبنیٰ ٹوانہ تھیں جبکہ دیگر شرکاء میں فرزانہ برنی،پی بی جی ویمن ونگ کی چیئرپرسن سمیت خواتین انٹرپرینیورز کی بڑی تعداد نے شرکت کی۔سرپرست اعلیٰ فراز الرحمان نے کہا کہ اسلام نے خواتین کو جو حقوق دیے ہیں وہ کسی بھی مذہب نے نہیں دیے۔اسلام نے خواتین کو جو رتبہ دیا وہ کسی مذہب میں نہیں ملا۔ انہوں نے کہا کہ ہمارا مذہب خواتین کے حقوق کا تحفظ کرتا ہے۔

جبکہ پاکستان کا آئین بھی اسی طرز پر خواتین کو برابر کے حقوق فراہم کرتا ہے۔ فرازالرحمان نے کہا کہ خواتین تجارت کے میدان میں بھی اپنا صلاحیتیں منوا رہی ہیں۔ پی بی جی خواتین کی خودمختاری کی بھرپور ہمایت کرتا ہے۔ انہوں نے کہا کہ آج کے معاشرے میں خواتین مردوں سے زیادہ ذمہ داریاں نبھا رہی ہیں۔ ورکنگ ویمن نہ صرف کاروبار بلکہ گھر دونوں کی ذمہ داریاں احسن طریقے سے نبھا رہی ہیں۔ فرا زالرحمان نے کہا کہ ہمیں خواتین کیلئے مینٹور کا کردار ادا کرنا ہوگا۔

انہوں خواتین کیلئے Learn 2 Earn ورکشاپ کا اعلان بھی کیا۔ فراز الرحمان نے مزید کہا کہ پاکستان میں خواتین کی ہر شعبے میں حوصلہ افزائی ہوتی ہے، یہی وجہ ہے کہ دنیا کی پہلی خواتین وزیر اعظم پاکستان کی تھیں۔ یہی نہیں پاک فوج میں خاتون جنرل، خاتون جج پاکستان میں ہی ہیں۔ لیکن بدقسمتی سے میڈیا میں صرف ان خواتین کو نمایا کیا جاتا ہے جن کے ساتھ ظلم اور زیادتی ہوتی ہے۔ یہ بات حقیقت ہے کہ کچھ علاقوں میں جہاں تعلیم عام نہیں وہاں خواتین کو حقوق نہیں مل رہےہ لیکن وہ اکثریت میں نہیں۔ معاشرے میں تعلیم عام کی جائے تو خواتین کا استحصال بھی ختم ہوگا۔ سرپرست اعلیٰ پی بی جی نے مزید کہا کہ ملک اور معاشرے کی ترقی کے لیے ضروری ہے کہ مرد اور عورت ایک ساتھ مل کر کام کریں تاکہ خوشحالی میں کردار ادا کرسکیں۔انہوں نے کہا کہ خواتین کے عالمی دن کی مناسبت سے ہمیں یہ عہد کرنا چاہیے کہ ان خواتین کی حوصلہ افزائی کریں گے جو معاشرے میں اپنا مقام حاصل کرنے اور اپنے اہل خانہ کی خوشحالی کیلئے گھر سے نکلی ہیں۔