کراچی کے علاقے نیو کراچی انڈسٹریل ایریا میں موٹر سائیکل سوار ملزمان نے بینک سے نکلنے والے شہری سے 10 لاکھ روپے لوٹ لیے جبکہ چھپائے گئے پانچ لاکھ روپے محفوظ رہے۔

انڈسٹریل ایریا پولیس کے مطابق نیو کراچی میں ایک بینک سے فیکٹری ملازم 15 لاکھ روپے لے کر جارہا تھا کہ سیکٹر 12 بی میں موٹر سائیکل سوار 2 مسلح ملزمان نے انہیں اسلحے کے زور پر یرغمال بنا کر 10 لاکھ روپے کی رقم لوٹ لی۔

شہری کے مطابق ملزمان مبینہ طور پر فیکٹری ملازم کے پیچھے بینک سے لگے ہوئے تھے، فیکٹری ملازم کے موٹر سائیکل روکتے ہی ملزمان سامنے آگئے، ملزمان نے جامع تلاشی لے کر رقم کے 2 پیکٹ نکالے۔

پولیس ذرائع کے مطابق چھپایا گیا 5 لاکھ روپے کا ایک پیکٹ محفوظ رہا۔

عینی شاہدین کے مطابق رقم چھین کر فرار ہونے کے دوران فیکٹری ورکر ہاتھ جوڑ کر رقم واپسی کا کہتا رہا مگر ملزمان واردات کے بعد فرار ہوگئے۔