کراچی میں لوڈشیڈنگ کا سلسلہ جاری ہے، شدید گرمی میں 4 سے 12 گھنٹوں کی لوڈشیڈنگ کی وجہ سے شہری پریشان ہوگئے ہیں۔

میڈیا رپورٹس کے مطابق کھارادر، لیاری، نیاآباد، کورنگی، اورنگی، لانڈھی، سرجانی ٹاؤن، قائدآباد، قیوم آباد اور کیماڑی میں طویل لوڈشیڈنگ ہورہی ہے۔

اس کے علاوہ نیوکراچی، نارتھ ناظم، ناظم آباد، لیاقت آباد، گلشن اقبال، گلستان جوہر اور اسکیم 33 میں بھی طویل لوڈشیڈنگ کا سلسلہ نہ رک سکا۔

اس حوالے سے شہریوں کا کہنا ہے کہ گرمی کے باعث گھر میں سکون ہے نہ ہی باہر جاسکتے ہیں، ہر 2 سے 3 گھنٹوں بعد 3 گھنٹوں کی لوڈشیڈنگ کی جاری ہے، رات کو 4 سے 5 گھنٹوں کی لوڈشیڈنگ ہوتی ہے۔

دوسری جانب کے الیکٹرک کے ترجمان کا کہنا ہے کہ شہر میں کہیں غیر اعلانیہ لوڈشیڈنگ نہیں کی جارہی، عدم ادائیگی اور بجلی چوری کرنے والے علاقوں میں شیڈول کی لوڈشیڈنگ جاری ہے۔