وزیر خارجہ بلاول بھٹو زرداری کا کہنا ہے کہ ایران کیساتھ دوطرفہ تعاون اور اقتصادی سفارت کاری مضبوط بنائیں گے۔

بلاول بھٹو زرداری نے 2 روزہ دورۂ ایران سے قبل ایرانی سرکاری میڈیا کو دیئے گئے ایک انٹرویو میں کہا کہ دونوں ممالک کی حقیقی صلاحیتوں سے فائدہ اٹھانا ہماری ترجیح ہے۔

انہوں نے کہا کہ ایران اور پاکستان کی اقوام کے درمیان دیرینہ، تاریخی تعلقات ہیں، دونوں ملکوں میں روحانی، ثقافتی، تاریخی اور سماجی مشترکات موجود ہیں۔

بلاول بھٹو کا کہنا تھا کہ ایران پاکستان میں عوامی رابطوں کو مضبوط کرنے کے زیادہ امکانات ہیں۔

انہوں نے بتایا کہ دورۂ ایران کےدوران افغانستان پر بھی بامعنی بات چیت ہوگی، دونوں ممالک کے درمیان ذرائع آمدورفت بڑھانے اور سیاحت پر بھی بات ہوگی۔

بلاول بھٹو کا مزید کہنا تھا کہ دورۂ ایران میں وہ ایرانی ہم منصب اور ایرانی صدر سے بھی ملاقات کریں گے۔