اسلام آباد: پاکستان مسلم لیگ (ن) کی ترجمان مریم اورنگزیب نے کہا ہے کہ آٹا چینی چور ملک پہ مسلط ہیں اورعوام کی ایک ایک چیز کو امانت سمجھنے والا گرفتار ہے۔

تفصیلات کے مطابق ‎پاکستان مسلم لیگ(ن) کی ترجمان مریم اورنگزیب نے اپنے بیان میں کہا کہ تحقیق مکمل ، ریفرنس جمع ، گواہان کا بیان قلمبند ٹرائل شروع ، لیکن عمران خان کے خوف نے شہباز شریف کو گرفتار کروا دیا ،‎پنجاب کو 5500 میگاواٹ بجلی دینے والا آج گرفتار ہے اور خیبر پختونخواہ میں 350 ڈیمز کا فراڈ کرنے والا عوام پہ مسلط ہے ۔

‎ مریم اورنگزیب کا کہنا تھا کہ پنجاب میں چار میٹرو ، اورنج ٹرین دینے والا گرفتار ہے اور پشاور بی آر ٹی میں 120 ارب کے کھڈے کھودنے والا ،‎پنجاب کو پی کے ایل آئی ، کارڈیالوجی ، کڈنی سنٹرز ، دانش سکول ، اسپتال ، اسکول یونیورسٹیز دینے والا گرفتار اور ادویات چور عوام پہ مسلط ہے ،شہباز شریف پر دھیلے کا الزام نہیں وہ ‎آج صدر مسلم لیگ (ن) شہباز شریف نہیں پنجاب کے عوام کی ترقی گرفتار ہے۔