پشاور: پشاور کے علاقے گلبہار میں نامعلوم افراد کی فائرنگ سے عوامی نیشنل پارٹی پشاور کے صدر سرتاج خان جاں بحق ہوگئے ہیں۔

ایس ایس پی آپریشن ظہور آفریدی کے مطابق بظاہر واقعہ ٹارگٹ کلنگ کا لگتا ہے،راہزنی کے شواہد نہیں ملے، مقتول کا پرس اور موبائل گاڑی میں موجود ہے۔

انہوں نے بتایا کہ سرتاج خان کو موٹر سائیکل سواروں نے گاڑی کے اندردو گولیاں ماریں،حملہ اوروں کی تلاش جاری ہے، سی سی ٹی وی فوٹیج حاصل کر رہے ہیں۔

مقتول رہنما کی نعش لیڈی ریڈنگ اسپتال پہنچا دی گئی ہے جہاں معمول کی کارروائی کے بعد اسے ورثہ کے حوالے کیا جائے گا،واقعہ کی اطلاع ملنے پر اے این پی کارکنان کی بڑی تعداد اسپتال پہنچی جبکہ پارٹی کے مرکزی صدر اسفند یار ولی نے فائرنگ کے واقعہ کی مذمت کی ہے۔