اسلام آباد: ترجمان چیئرمن پیپلز پارٹی سینیٹر مصطفیٰ نواز کھوکھر نے کہا ہے کہ جب سے سیلیکٹڈ حکومت آئی ہے ہر شعبہ زوال پذیر ہے۔

انہوں نے کہا کہ اقتصادی سروے نے حکومت کی دعووں کی قلعی کھول کر رکھ دی ہے،عمران خان حکومت کی ناقص معاشی پالیسیوں کی وجہ سے کوئی بھی شعبہ ترقی نہیں کر رہا، تشویشناک بات یہ ہے کہ آئندہ کئی سال تک حالات میں بہتری آنے کی کوئی امید نہیں۔

سینیٹر مصطفیٰ نواز نے کہا کہ آنے والا بجٹ معاشی تباہی کا ایک اور سونامی لا رہا ہے،ناکام عمران خان حکومت اپنی ناکامیاں چھپانے کیلئے عوام پر ٹیکسوں کا مزید بوجھ ڈالے گی،مہنگائی کے بوجھ تلے دبے عوام مزید ٹیکسوں کو بوجھ برداشت نہیں کر پائیں گے۔

عمران خان کی مہنگائی کا سونامی نچلے طبقے کو بہا کر لے گیا ہے، مہنگائی کی نئی لہر نے مستوط طبقے کی کمر توڑ دی ہے، غریب تو ایک وقت کی روٹی بھی نہیں کھا رہا، اب مڈل کلاس مہنگائی کے بوجھ میں دب جائے گا،معاشی ناکامیاں اپنی جگہ حکومت نے سیاسی قوتوں اور عدلیہ سے ساتھ بھی محاذ آرائی بڑھا دی ہے۔

انہوں نے مزید کہا کہ پیپلز پارٹی حکومت کی ناکامیوں کے خلاف کل سی ای سی میں حکمت عملی طے کرے گی، اپوزیشن عوام کو حکومت کے ناکامیوں کے سونامی کے رحم و کرم پر نہیں چھوڑ سکتی۔