اسلام آباد: وزیر اعظم عمران خان کی زیر صدارت وفاقی کابینہ کا اجلاس جاری ہے جس میں اپوزیشن کے ممکنہ احتجاج اور ملک کی سیاسی و معاشی صورتحال کا جائزہ لیا جائے گا۔

ذرائع کے مطابق عمران خان او آئی سی کے سربراہ اجلاس سے متعلق کابینہ کو اعتماد میں لیں گے جب کہ اثاثے ظاہر کرنے کے وزیراعظم کے اعلان پر عملدرآمد اور پیٹرولیم مصنوعات کی قیمتوں میں اضافے کا جائزہ بھی لیا جائے گا۔

وفاقی کابینہ کے اجلاس میں انسداد دہشتگردی عدالت اسلام آباد کے اسپیشل جج کی تقرری اور عتیق احمد کو وفاقی تعلیمی بورڈ کا چیئرمین مقرر کرنے کی منظوری بھی دے جائے گی۔

علاوہ ازیں اجلاس میں وزارت داخلہ اور وزارت خارجہ کے حکام کابینہ کو نئی ویزہ پالیسی پر بریفنگ دیں گی۔

اس کے علاوہ چینی شہریوں کے بزنس ویزہ کو ورک ویزہ میں منتقل کرنے، انشورنس ٹریبونل ملتان اور لاہور کے ممبر اور چیئرپرسن کی تقرری کی منظوری اور بچوں کے حقوق کا قومی کمیشن تشکیل دینے کی منظوری بھی وفاقی کابینہ کے ایجنڈے میں شامل ہیں۔

وفاقی کابینہ 2018 کے انتخابات کی سالانہ رپورٹ اور نجی ائیرلائن کے لائسنس کی منسوخی کا جائزہ بھی لے گی۔