برسٹل: انگلینڈ کے خلاف حالیہ مایوس کن سیریز کے بعد پاکستان ٹیم آج سے ورلڈکپ کے مشن کا آغاز کرنے جارہی ہے اور اس سلسلے میں وہ افغانستان کے خلاف پہلے وارم اپ میچ میں گرین شرٹس کی بیٹنگ جاری ہے۔

ورلڈکپ 2019 کا باقاعدہ آغاز 30 مئی سے ہوگا تاہم اس سے قبل تمام ٹیمیں اپنے اپنے وارم اپ میچز کھیل رہی ہیں۔

برسٹول کے کاؤنٹی گراؤنڈ میں کھیلے جا رہے میچ میں پاکستان کی جانب سے اننگز کا آغاز امام الحق اور فخر زمان نے کیا تاہم 47 کے مجموعی اسکور پر امام الحق 32 رنز بنا کر آؤٹ ہو گئے۔

فخر زمان بھی 19 رنز بنا کر محمد بنی کا شکار بن گئے جب کہ اسی اوور میں حارث سہیل بھی ایک رن بنا کر بولڈ ہو گئے۔ محمد حفیظ 12 رنز ہی بنا سکے۔

بابراعظم اور شعیب ملک وکٹ پر موجود ہیں اور دونوں ٹیموں کے درمیان 95 رنز کی شراکت قائم ہو چکی ہے۔

گرین شرٹس 26 مئی کو اپنا دوسرا وارم اپ میچ بنگلادیش کے خلاف کھیلیں گے۔

کپتان سرفراز احمد کا کہنا ہے کہ ورلڈ کپ جیتنا چاہتے ہیں، وہاب ریاض اور محمد عامر کی ٹیم میں شمولیت سے بولنگ اٹیک مضبوط ہوا ہے۔

پاکستانی اسکواڈ:

ورلڈکپ کے لیے پاکستان اسکواڈ کپتان سرفراز احمد، فخر زمان، امام الحق، آصف علی، بابر اعظم، شعیب ملک، محمد حفیظ، حارث سہیل، عماد وسیم، شاداب خان، محمد عامر، حسن علی، وہاب ریاض، محمد حسنین اور شاہین شاہ آفریدی پر مشتمل ہے۔

افغانستان اسکواڈ:

افغانستان کے اسکواڈ میں کپتان گلبدین نائب، محمد شہزاد، نور علی زدران، حضرت اللہ زازئی، رحمت شاہ، اصغر افغان، حشمت اللہ شہیدی، نجیب اللہ زدران، سمیع اللہ شنواری، محمد نبی، راشد خان، دولت زدران، آفتاب عالم، حامد حسن اور مجیب الرحمان شامل ہیں۔