اسلام آباد: مسلم لیگ (ن) کے رہنما مفتاح اسماعیل نے کہاہے کہ عمران خان اور اسد عمر نے جتنی بری معیشت عبدالحفیظ شیخ کودی ہے، اس پر اُن سے ہمدردی ہے،تحریک انصاف کی حکومت کومسلم لیگ (ن) سے ورثے میں ایک اچھی معیشت ملی تھی لیکن انہوں نے تاریخی خسارے پیدا کیے ۔

سابق وزیرخزانہ مفتاح اسماعیل نے معاشی صورتحال پراپنے بیان میں کہاکہ ملکی تاریخ میں سب سے زیادہ تیزی سے قرض، حکومتی اخراجات اور بجٹ خسارہ بڑھ رہا ہے۔ پی ٹی آئی حکومت کا بجٹ خسارہ 2700 ارب متوقع ہے۔ عوام پی ٹی آئی کی نااہلی کی سزا بھگت رہی ہے۔

انہوں نے کہا صرف عمران خان اور اسد عمر کو یہ اعزاز حاصل ہے کہ پاکستان کی تاریخ کا سب سے بڑا خسارہ پیدا کیا۔ مجموعی قومی پیداوار کا 7.2 فیصد کا خسارہ مسلم لیگ (ن) کے کسی بھی دورکے خسارے سے زیادہ ہے۔ملکی تاریخ میں اس طرح کے خسارے کی شرح بہت کم پائی جاتی ہے۔

مفتاح اسماعیل نے کہاحیرت کی بات ہے کہ ایک ایسی پارٹی جس نے حکومتی اخراجات میں کمی کو اپنا بنیادی مقصد و ہدف قرار دیاتھا۔کسی بھی شعبے میں اخراجات کم نہیں کرسکی۔ کیا اس سے یہ ثابت نہیں ہوتا کہ الیکشن سے پہلے کا بیانیہ محض جھوٹ پر مبنی تھا؟۔

مفتاح اسماعیل نے کہاکہ پی ٹی آئی کے وزراءنے فرنس آئل، ادویات سمیت بڑی صنعتی طاقتوں کے ساتھ مل کر قوم کو نقصان پہنچایا ہے۔ مہنگائی چار فیصد اور ترقی کی شرح 5.8 فیصد تھی لیکن آج لوگوں کو نوکریاں نہیں مل رہیں۔ عوام کے لئے گزارا کرنا مشکل ہورہا ہے۔